Flokkur fólksins var beinlínis stofnaður til að berjast gegn fátækt, sérstaklega barna, og sú barátta hefur verið leiðarljós í öllum störfum þingmanna hans og borgarfulltrúa. Tölurnar tala skýru máli: Í dag er áætlað að um 35 þúsund manns búi við fátækt á Íslandi, þar af um tíu þúsund börn.

 

Eitt af hverjum tíu börnum á Íslandi hefur ekki sömu tækifæri og jafnaldrar þeirra. Ekki vegna skorts á hæfileikum, heldur vegna bágrar fjárhagsstöðu fjölskyldu þeirra. Þetta er óásættanlegt í samfélagi einnrar ríkustu þjóða heims sem sver sig við lýðræðisleg gildi.

 

Áherslur Flokks fólksins eru skýrar. Ríki og sveitarfélög verða að tryggja lágmarksframfærslu barnafjölskyldna þannig að ekkert foreldri þurfi að velja á milli þess að greiða húsaleigu og þess að greiða fyrir eðlilegar tómstundir barna. Jafn aðgangur að íþróttum, menningu og öðrum tómstundum á að vera raunverulegur en ekki aðeins í orði.

 

Húsnæðismál eru órjúfanlegur hluti af baráttunni gegn fátækt. Íþyngjandi húsnæðiskostnaður er ráðandi þáttur í lífi efnaminni fjölskyldna. Flokkur fólksins hefur nú þegar hleypt af stað metnaðarfullum áætlunum í uppbyggingu íbúðarhúsnæðis. Innan skamms hefst uppbygging á um fjögur þúsund íbúðum í Úlfarsárdal þar sem sérstaklega er horfti til þarfa efnaminna fólks á leigu- og almennum húsnæðismarkaði. Þá kynntu Ragnar Þór Ingólfsson félags- og húsnæðismálaráðherra flokksins og borgarstjóri nýlega uppbyggingu á fjölmörgum lóðum og í húseignum í eigu ríkisins. Þar er gert ráð fyrirum 1.400 íbúðum, sem eru fleiri íbúðir en byggðar voru á sínum tíma í húsnæðisátaki í Breiðholti.

 

Flokkur fólksins leggur höfuðáherslu á snemmtæka íhlutun þegar kemur að börnum. Það er mjög mikilvægt að fjárfesta í börnum á fyrstu árum ævinnar. Það er að sjálfsögðu mannúðlegasta en jafnframt hagkvæmasta leiðin fyrir bæði fjölskyldur og opinbera aðila til að rjúfa vítahring fátæktar. Þá þarf aðgengi að heilbrigðis- og sálfræðiþjónustu að vera tryggt, sérstaklega fyrir börn í viðkvæmri stöðu.

 

Kolbrún Áslaugar Baldursdóttir þingmaður Flokks fólksins í Reykjavík og fyrrverandi borgarfulltrúi leiðir nú stýrihóp á vegum mennta- og barnamálaráðherra sem ætlað er að móta heildstæða stefnu og aðgerðaáætlun gegn fátækt barna. Niðurstöður hópsins og tillögur til aðgerða verða kynntar á næstunni.

 

Hópurinn hefur átt á samtöl við fjölmarga innan grasrótarsamtaka, sérfræðinga og fjölskyldur sem búa við fátækt. Það er ekki hægt að móta raunhæfar aðgerðir án þess að hlusta eftir sjónarmiðum þeirra sem þekkja málin af eigin raun. Þá liggja fyrir niðurstöður fjölmargra rannsókna um ástæður og afleiðingar fátæktar sem auðvelda stýrihópnum vinnu sína.

 

Rannsóknir leiða meðal annars í ljós að fólk sem býr við fátækt er ólíklegra til að hafa framhaldsmenntun, það býr við lakari heilsu og kjör á vinnumarkaði svo eitthvað sé nefnt. Áætlaður samfélagslegur heildarkostnaður vegna fátæktar á Íslandi er talinn vera á bilinu 31-95 milljarðar króna á ári.

 

Þetta ásamt fleiri neikvæðum hliðum fátæktar er staðfest í skýrslu forsætisráðuneytisins frá árinu 2023 um fátækt og áætlaðan samfélagslegan kostnað. Það er því ljóst að fjárfesting í aðgerðum gegn fátækt barna er augljóslega efnaminni fjölskyldum og samfélaginu í heild til mikilla bóta.

 

Reykjavíkurborg getur gert mun betur í að bæta og jafna aðstæður efnaminni fjölskyldna á við aðra. Horfa verður á málið í heild sinni, allt frá aðstæðum barna efnaminni fjölskyldna í leikskólum og skólum borgarinnar til húsnæðismála.

 

Flokkur fólksins er vakinn og sofinn í þessari baráttu. Þessi mál eru ekki aukaatriði hjá Flokki fólksins heldur aðalatriði. Við höfum þegar gripið til fjölmargra aðgerða á rúmu ári í ríkisstjórn og ætlum að fylgja þeim eftir í borgarstjórn. Ekkert barn á að búa við skort í Reykjavík. Við gleymum ekki þeim efnaminni í borginni, fötluðu fólki, öryrkjum og börnum með fjölþættan vanda.